worldvideo: វៀតណាម ត្រៀមសងសឹកម៉ាឡេស៊ី នៅរសៀលថ្ងៃនេះ

ក្រុមបាល់ទាត់ជម្រើសជាតិវៀតណាម នឹងត្រូវប៉ះគូប្រជែងធំម៉ាឡេស៊ី ក្នុងការប្រកួតពានរង្វាន់ AFF Suzuki Cup 2016 ពូល B ប្រកួតលើកទី២ នៅទីក្រុងរ៉ង់ហ្គូន វេលាម៉ោង០៣:៣០នាទីរសៀលថ្ងៃនេះ ដើម្បីស្វែងរកកៅអីទៅវគ្គពាក់កណ្ដាលផ្ដាច់ព្រ័ត្រ និងដើម្បីសងសឹកភាពឈឺចាប់ផងដែរ។

ខ្សែប្រយុទ្ធវៀតណាម Cong Vinh យំ ក្រោយចាញ់ម៉ាឡេស៊ី ធ្លាក់ AFF Suzuki Cup កាលឆ្នាំ២០១៤

វៀតណាម ប្រកួតបើកឆាកដំបូង បានយកឈ្នះម្ចាស់ផ្ទះមីយ៉ាន់ម៉ា ២-១ ខណៈដែលម៉ាឡេស៊ី បានឈ្នះលើកម្ពុជា ៣-២។ ដូច្នេះក្រុមទាំង២នេះ បើក្រុមមួយណាឈ្នះ នឹងអាចឡើងទៅវគ្គពាក់កណ្ដាលផ្ដាច់ព្រ័ត្រដោយស្វ័យប្រវត្តិ ទោះសល់១ប្រកួតក្នុងដៃទៀតក៏ដោយ។

ក្រុមជម្រើសជាតិវៀតណាម បានធ្លាក់វគ្គពាក់កណ្ដាលផ្ដាច់ព្រ័ត្រ AFF Suzuki Cup កាលឆ្នាំ២០១០ ក្រោមថ្វីជើងម៉ាឡេស៊ី បន្ទាប់ពីជើងទី១នៅម៉ាឡេស៊ី ពួកគេចាញ់ ២-០ និងជើងទី២ នៅទីក្រុងហាណូយ បញ្ចប់លទ្ធផលត្រឹមស្មើ ០-០។

ជួបគ្នាម្ដងទៀតឆ្នាំ២០១៤ ពានរង្វាន់ AFF Suzuki Cup នេះដដែល វៀតណាមធ្លាក់ក្រោមថ្វីជើងម៉ាឡេស៊ីទៀត បន្ទាប់ពីជើងទី១នៅម៉ាឡេស៊ី ពួកគេឈ្នះ ២-១ និងមានរឿងរ៉ាវអ្នកគាំទ្រវាយគ្នាបែកឈាម នាពេលនោះផងដែរ។ ត្រឡប់មកជើងទី២ ទឹកដីខ្លួនឯង វៀតណាមបែរជាភ្លាត់ចាញ់ម៉ាឡេស៊ីដល់ទៅ ៤-២ ទោះបីខ្សែប្រយុទ្ធឆ្នើម Le Cong Vinh ស៊ុតបាន ២គ្រាប់ម្នាក់ឯងក៏ដោយ។

ការធ្លាក់ក្រោមថ្វីជើងម៉ាឡេស៊ី នៅទឹកដីខ្លួនឯងឆ្នាំ២០១៤ បានធ្វើឲ្យកីឡាករជម្រើសជាតិវៀតណាមជាច្រើនខកចិត្តយំគ្រប់គ្នា ខណៈដែលអ្នកគាំទ្ររាប់ម៉ឺននាក់ ដែលទៅទស្សនាផ្ទាល់នៅកីឡដ្ឋានជាតិ My Dinh ក៏បានបង្ហូរទឹកភ្នែកឥតឈប់ឈរផងដែរ។ ដូច្នេះចាំមើលថា ប៉ះគ្នាឆ្នាំ២០១៦ថ្ងៃនេះ វៀតណាម អាចសងសឹកម៉ាឡេស៊ី បានឬយ៉ាងណា សូមរង់ចាំតាមដានលទ្ធផលទាំងអស់គ្នា៕