"ពេលមានលុយតិចក៏ចាយខ្វះ ដល់តែពេលមានលុយច្រើនហើយនៅតែចាយខ្វះទៀត"។ ពាក្យមួយឃ្លានេះតែងតែលឺជាញឹកញយពីមនុស្សមួយចំនួនធំ។ កត្តាចម្បងដែលបណ្ដាលឱ្យចាយលុយមិនសល់នោះ គឺមកពីមិនចេះបែងចែកប្រាក់ចំណូល-ចំណាយឲ្យបានត្រឹមត្រូវ។ នេះជាការលើកឡើង របស់ លោក ជី ដានិត ដែលជាបុគ្គលិកក្នុងក្រុមហ៊ុន ឯកជនមួយកន្លែង និងជាអ្នកដែលមានជីវភាពធូរធារផងនោះបានចែករំលែកវិធីសាស្រ្តគ្រប់គ្រងប្រាក់ចំណូល-ចំណាយ ខាងក្រោម៖
១. លុយចាយវាយប្រចាំថ្ងៃ ប្រាក់ចំណូលដែលយើងរកបានក្នុងមួយខែៗ យើងគួរដកមួយផ្នែកទុកចាយវាយប្រចាំថ្ងៃ ហើយការចាយវាយប្រចាំថ្ងៃនេះទៀត គឺយើងត្រូវធ្វើការបែងចែកឱ្យច្បាស់លាស់ទៀតថា ក្នុងមួយថ្ងៃយើងចំណាយទៅលើអ្វីខ្លះ ហើយកំណត់ថាក្នុងមួយថ្ងៃ ចាយអស់ប៉ុន្មាន។ ប្រសិនបើយើងមិនបានធ្វើការបែងចែកឱ្យបានត្រឹមត្រូវដូចនេះទេ ទោះមានប្រាក់ខែប៉ុន្មានក៏មិនសល់លុយដែរ។ នេះជាការលើកឡើងរបស់លោក ជី ដានិត។
២. លុយសម្រាប់សន្សំ
ប្រាក់ចំណូលដែលរកបានក្នុងមួយខែ គួរធ្វើការបែងចែកមួយផ្នែកសម្រាប់សន្សំ ពីព្រោះថាប្រសិនបើមិនបានធ្វើការបែងចែកឱ្យបានច្បាស់លាស់នោះទេ ក្នុងមួយឆ្នាំៗយើងប្រាកដជា គ្មានលុយសល់នោះឡើយ។ លោកបានបញ្ជាក់ទៀតថា លុយសម្រាប់សន្សំនេះមិនចាំបាច់ទាល់តែមានប្រាក់ខែច្រើនទើបធ្វើបាននោះទេ។ ឧទាហរណ៍ ប្រសិនបើប្រាក់ខែ ១០០ ដុល្លារ គួរចាយតែ ៨០ដុល្លារបានហើយទុក២០ដុល្លារសម្រាប់សន្សំ។ នៅត្រង់ចំណុចនេះមានន័យថា ចាយលុយទៅតាមលទ្ធភាពដែលរកបាន ហើយត្រូវចេះសន្សំតាំងពីប្រាក់ខែតិចឡើងទៅ។
៣. លុយសម្រាប់វិនិយោគ
លុយសម្រាប់វិនិយោគខុសពីលុយសម្រាប់សន្សំ លុយសន្សំទុកប្រើប្រាស់ក្នុងករណីចាំបាច់ពេលការបន្ទាន់ដូចជាលុយទុកទិញផ្ទះ ទិញឡាន ទិញម៉ូតូ ជាដើម។ ហើយលុយសម្រាប់វិនិយោគនេះ ជាការបែងចែកប្រាក់ចំណូលមួយផ្នែកទៀតបន្ទាប់ ពីមានប្រាក់ខែច្រើនជាងមុន ព្រោះថាកាលមានប្រាក់ខែតិចយើងគ្មានលទ្ធភាព ក្នុងការសន្សំលុយសម្រាប់រកស៊ីទេ ប៉ុន្តែនៅពេលប្រាក់ខែច្រើនហើយ យើងគួរបែងចែកមួយផ្នែកទៀតទុករកស៊ី។ ដូច្នេះមានន័យថា យើងអាចបែងចែកប្រាក់ចំណូលរបស់យើងបានបីផ្នែកហើយគឺលុយសម្រាប់ចាយវាយប្រចាំថ្ងៃ លុយសម្រាប់សន្សំ និង លុយសម្រាប់ទុករកស៊ី។
៤. លុយសម្រាប់សុខភាព
មនុស្សយើងម្នាក់ៗមិនប្រាកដថា សុខភាពល្អរហូតនោះទេ ដូចនេះហើយគួរធ្វើការបែងចែកប្រាក់ចំណូលមួយផ្នែកទៀតដើម្បីមើលថែសុខភាព និងនៅពេលដែលឈឺគឺមានលុយផ្សេងទៀតសម្រាប់ព្យាបាល។ ការបែងចែកលុយគឺត្រូវធ្វើម្ដងមួយជំហានៗទៅតាមលទ្ធភាពលុយដែលរកបាន លុយកាន់តែច្រើនគឺត្រូវធ្វើការបែងចែកកាន់តែច្រើនដូចគ្នា។ មិនមែនលុយកាន់តែច្រើនហើយការបែងចែកលុយនៅតែដដែលនោះទេ។ ជាពិសេសសុខភាពនេះតែម្ដងត្រូវធ្វើបែងចែកលុយដែលរកបាន គិតគូរលើសុខភាពខ្លះផង ព្រោះទាល់តែសុខភាពល្អទើបអាចរកលុយបានទៀត។
៥. លុយសម្រាប់ដំណើរកម្សាន្ត ត្រង់ចំណុចនេះលោក ជី ដានិត បានលើកឡើងថា៖ ជាការពិតជីវិតមនុស្សយើងម្នាក់ៗ មិនអាច គិតតែរឿងរកលុយ ភ្លេចផ្ដល់សេចក្ដីសុខដល់ខ្លួនឯងនោះទេ។ ដូចនេះយើងគួរបែងចែកប្រាក់ចំណូលដែលរកបានមួយផ្នែកទៀតទុកសម្រាប់ដំណើរកម្សាន្ត។ លោកបន្តទៀតថា ដំណើរកម្សាន្តទៀតសោតយើងត្រូវ រៀបចំគម្រោងឱ្យច្បាស់លាស់ ថាចង់ទៅកម្សាន្ត ក្នុងស្រុកឬ ក្រៅប្រទេស ប្រសិនបើដំណើរកម្សាន្តក្នុងស្រុកអាចចំណាយអស់ប៉ុន្មាន ហើយក្រៅសុខអស់ប៉ុន្មាន។ នៅពេលដែលយើងរៀបចំគម្រោងបានច្បាស់លាស់ហើយ យើងចាប់ផ្ដើមធ្វើការសន្សំលុយពីឥលូវឱ្យហើយ នៅពេលដែលដល់ថ្ងៃ គឺយើងមានលុយពេញដៃ មិនចាំបាច់ដកលុយពីផ្នែកផ្សេងៗទៀតនោះទេ។
No comments:
Post a Comment