ព្រលានយន្តហោះអន្តរជាតិ ២កន្លែងក្នុងខេត្តផ្សេងគ្នា នៅកម្ពុជាចាប់ផ្ដើមដំណើរការសាងសង់ហើយ និងគ្រោងចំណាយថវិការាប់លានដុល្លារ តាមរយៈការវិនិយោគពីក្រុមហ៊ុនបរទេស។ តើព្រលានយន្តហោះអន្តរជាតិ ២កន្លែងនោះ ស្ថិតនៅខេត្តណាខ្លះ? តោះទៅស្គាល់ទាំងអស់គ្នា!
១. ព្រលានយន្តហោះអន្តរជាតិនៅខេត្តកោះកុង
បើតាមការឱ្យដឹងពីលោក ស៊ិន ចាន់សិរីវុត្ថា អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិល បានប្រាប់អ្នកសារព័ត៌មានក្នុងស្រុកថា ព្រលានយន្តហោះលំដាប់អន្តរជាតិថ្មីមួយនៅខេត្តកោះកុង ដែលវិនិយោគដោយក្រុមហ៊ុនUnion Development Group (UDG) របស់ប្រទេសចិន កំពុងចាប់ផ្តើមសាងសង់ហើយ។
លោកបានឱ្យដឹងទៀតថា ព្រលានយន្តហោះអន្តរជាតិនេះ ស្ថិតនៅក្នុង ស្រុកបទុមសាគរ ខេត្តកោះកុង តាមគម្រោងព្រលានយន្តហោះនេះ គ្រោងវិនិយោគទឹកប្រាក់ចន្លោះពី ៣០០ទៅ៣៥០លានដុល្លារអាមេរិក។ បច្ចុប្បន្ននេះ កំពុងចាប់ផ្ដើមឈូសឆាយដី ដើម្បីរៀបចំជាការដ្ឋានហើយ។លោកបានបន្ថែមទៀតថា ព្រលានយន្តហោះនេះមានទំហំដី៧៥០ហិកតា ជាលក្ខណៈខ្នាតអន្តរជាតិតែម្ដង ហើយអាចទទួលការចុះចតយន្តហោះមកពីគ្រប់ទិសទី។
អ្នកនាំពាក្យរដ្ឋលេខាធិការដ្ឋានអាកាសចរណ៍ស៊ីវិលរូបនេះបានបញ្ជាក់ថា ព្រលានយន្តហោះនេះអាចចុះចតយន្តហោះប្រភេទ4C ជាយន្តហោះខ្នាតមធ្យមបាន។ ដោយឡែក ចំពោះការបញ្ចប់ការសាងសង់នៅពេលណា លោកមិនទាន់អាចបញ្ជាក់បាននៅឡើយទេ។ ចំណែកឯការសិក្សាពីផលប៉ះពាល់បរិស្ថានស្ថិតក្រោមសមត្ថកិច្ចរបស់ក្រសួងបរិស្ថាន ហើយការសាងសង់ស្ថិតក្រោមក្រសួងរៀបចំដែនដី នគរោបនីយកម្ម និងសំណង់។
២. ព្រលានយន្តហោះអន្តរជាតិនៅខេត្តសៀមរាប
ព្រលានយន្តហោះថ្មី ក្នុងខេត្តសៀមរាប នឹងចាប់ផ្ដើមសាងសង់ឆ្នាំ២០១៨ ក្រោយកិច្ចព្រមព្រៀង និងនិតិវិធីនានារវាងរដ្ឋាភិបាល និងក្រុមហ៊ុនវិនិយោគ បានបញ្ចប់រួចរាល់។
រូបគំរូនៃព្រលានយន្តហោះថ្មី ខេត្តសៀមរាប
លោកស៊ិន ចាន់សិរីវុត្ថា ដដែលបានថ្លែងឲ្យដឹងថា ព្រលានយន្តហោះដែលមានទីតាំងស្ថិតក្នុងស្រុកសូត្រនិគម ខេត្តសៀមរាប ស្ថិតនៅលើផ្ទៃដី ប្រមាណ ៧៥០ហិចតា នឹងចាប់ផ្ដើមសាងសង់នៅឆ្នាំក្រោយនេះ ព្រោះអ្វីៗស្ថិតតែក្នុងដំណាក់កាលចរចារវាងរដ្ឋាភិបាល និងក្រុមហ៊ុនវិនិយោគព្រលានយន្តហោះកម្ពុជា SCA ប៉ុណ្ណោះ។ លោកបន្តថា បច្ចុប្បន្នក្រុមហ៊ុនដែលទទួលបានសិទ្ឋិវិនិយោគព្រលាននេះ គឺក្រុមហ៊ុនYUNAN Development Group បានចាប់ផ្តើមឈូសពង្រាបដី និងដោះមីនបណ្តើរៗហើយ។
លោកបន្តថា ព្រលានយន្តហោះនេះ នឹងសាងសង់ជាពីរដំណាក់កាល ដោយដំណាក់កាលទី១ គ្រោងចំណាយថវិកា៥០០លានដុល្លារ ដែលអាចឲ្យចុះចតយន្តហោះខ្នាតមធ្យមសម្រាប់យន្តហោះខ្នាត4E និងដំណាក់កាលទី២ គ្រោងចំណាយថវិកាជាង ៣០០លានដុល្លារទៀត ទើបអាចចុះចតយន្តហោះខ្នាតយក្សបាន។ ចំណែកឯការសាងសង់ព្រលានយន្តហោះនេះអាចចំណាយពេលពី៣ទៅ៥ឆ្នាំ ដើម្បីបញ្ចប់ទាំងដំណាក់កាលទី១និងដំណាក់កាលទី២៕
ប្រភព៖ Sabay
No comments:
Post a Comment