អ្នកប្រហែលជាកើតជំងឺផ្សិតហើយ បើមានអារម្មណ៍ថារមាស់ និងមានស្នាមក្រហម ដោយជំងឺនេះអាចកើតឡើងនៅផ្នែកផ្សេងៗលើរាងកាយ (ស្បែក ក្បាល ជើង ចង្កា ក្រលៀន គូទ ក្រចកជើង ក្រចកដៃ) ហើយជាធម្មតាបង្កឡើងដោយពពួកផ្សិតនៅកន្លែងមានសំណើម ដូចជា ស្បែកជើងបែកញើស ការងូតទឹកផ្កាឈូករួម និងបន្ទប់ចាក់សោជិត។ មិនមែនជំងឺផ្សិតទាំងអស់ សុទ្ធតែមានរោគសញ្ញាដូចគ្នានោះទេ។ ជំងឺផ្សិតមានច្រើនប្រភេទ៖
១. ជំងឺស្រែង
ជាជំងឺផ្សិតនៅលើស្បែកដែលអាចបណ្ដាលឲ្យឆ្លងដោយផ្ទាល់តាមរយៈការប៉ះពាល់ស្បែកនឹងស្បែក ការប្រើកន្សែង សំលៀកបំពាក់ ឬកម្រាលរួមគ្នា ដោយជាទូទៅ តំបន់រងផលប៉ះពាល់ខ្លាំងបំផុត រួមមាន ស្បែក ក្បាល ជើង នៅក្រោមសុដន់ និងក្រលៀន ហើយអ្នកកើតជំងឺស្រែង មានអាការៈរមាស់ខ្លាំង និងឈឺ ទំពែកដុំៗលើសក់ កន្ទួលពណ៌ក្រហម ពងបែក និងក្រចកប្រែជាពណ៌លឿង ឬពណ៌សខុសពីធម្មតា។
២. ជំងឺផ្សិតទ្វារមាស
ស្ត្រីមានជំងឺផ្សិតទ្វារមាស ក៏ទំនងជាឆ្លងមេរោគដទៃទៀតតាមទ្វារមាសផងដែរ ដោយអ្នកជំងឺអាចរមាស់ រលាកក្នុងទ្វារមាស ដែលមានពណ៌ក្រហមខ្លាំង ឈឺចាប់ពេលនោម អំឡុងពេលរួមភេទ និងហូរសារធាតុរាវពីទ្វារមាសខុសធម្មតា។
៣. ជំងឺផ្សិត Candidiasis ស្បែក និងក្រចក
ជំងឺផ្សិត Candidiasis បង្កឡើងដោយមេរោគ Candida និង yeast មានក្នុងរាងកាយលូតលាស់ច្រើនខុសធម្មតា ហើយអ្នកកើតជំងឺនេះអាចមានអាការៈ រមាស់ កន្ទួល ស្នាមសៗលើស្បែក ស្បែកស្ងួត រលាកស្បែក ត្រអក (តាអក) និងជំងឺស្បែក psoriasis។ ជំងឺនេះបណ្ដាលឲ្យក្រចកអ្នកឡើងក្រាស់ មិនរលោង ឬរាបស្មើ ផុយស្រួយ និងធ្វើឲ្យសាច់នៅជុំវិញក្រចករបក និងធ្វើឲ្យក្រចកប្ដូរពណ៌ និងឈឺ។ ពេលខ្លះ ជើងមានក្លិនស្អុយ ក៏អាចជាសញ្ញាជំងឺផ្សិត។
ចុះត្រូវព្យាបាលម៉េចទៅ?
ថ្នាំអង់ទីប៊ីយ៉ូទីក អាចព្យាបាលជំងឺបណ្ដាលមកពីបាក់តេរីប៉ុណ្ណោះ តែមិនមែនមេរោគផ្សិត ឬវីរុសឡើយ។ អ្នកត្រូវទៅជួបគ្រូពេទ្យដើម្បីបើកថ្នាំមកព្យាបាល ហើយថ្នាំទាំងនោះអាចស្ថិតក្នុងទម្រង់ជាថ្នាំគ្រាប់ ក្រែម ជែល ឬថ្នាំសុល អាស្រ័យលើប្រភេទជំងឺផ្សិត ហើយអ្នកគួររក្សាអនាម័យឲ្យបានខ្ជាប់ខ្ជួន និងថែទាំឲ្យបានត្រឹមត្រូវ៕
No comments:
Post a Comment