Huawei បានប្រកាសចេញជាផ្លូវការនូវបន្ទះឈីបស៊េរីថ្មី Kirin 970 ក្នុងកម្មវិធីតាំងបង្ហាញផលិតបច្ចេកវិទ្យា IFA ឆ្នាំ ២០១៧។
បន្ទះឈីបស៊េរីថ្មីនេះមានផ្ទុកដោយ CPU ៨ គ្រាប់ មាន ៤ គ្រាប់ល្បឿន ២,៤ GHz ប្រភេទ Cortex-A73 និង ៤ គ្រាប់ទៀតល្បឿន ១,៨ GHz ប្រភេទ Cortex-A53, មានផ្ទុក GPU Mali-G72MP12 ១២ គ្រាប់ និង មានទំហំ ១០ ណាណូម៉ែត្រ។ ក្រៅពីនេះក៏មានបំពាក់នូវ NPU (Neural Processing Unit) ដែលមានតួនាទីទ្រាំទ្រនឹងបច្ចេកវិទ្យា AI ផងដែរ។ បន្ទះឈីបថ្មីនេះមានល្បឿនលឿនជាង Kirin 960 ចំនួន ២០% និងប្រើប្រាស់ថាមពលតិចជាងមុន ៥០% ឯណោះ។
លោក Richard Chu នាយកជាន់របស់ Huawei បានលើកឡើងក្នុងកិច្ចសម្ភាសន៍អំឡុងកម្មវិធី IFA ថា ៖ "ប្រៀបធៀបនឹង Samsung និង Apple យើងនាំមុខជាង។ អ្នកប្រើប្រាស់ចាប់អារម្មណ៍ខ្លាំងលើដំណើរការដែលមានលឿនលឿន, ថ្មមានថាមពលប្រើបានយូរ និង ការរចនាទាក់ទាញ”។
បញ្ជាក់ថាស្មាតហ្វូនដំបូងរបស់ Huawei ដែលនឹងប្រើបន្ទះឈីបនេះគឺ Huawei Mate 10 និង Mate 10 Pro ដែលគ្រោងបង្ហាញខ្លួននៅថ្ងៃទី ១៦ ខែតុលាខាងមុខ៕
No comments:
Post a Comment