Point Nemo ជាតំបន់មួយនៅក្នុងមហាសមុទ្រប៉ាស៊ីហ្វិក ជាទីកន្លែងដ៏សក្ដិសមមួយសម្រាប់បោះចោលយានអវកាសចាស់ៗដែលខូច និងជិតខូច។
អង្គការណាសាបានហៅតំបន់នេះថា ទីកន្លែងបញ្ចុះសពយានអវកាស ដោយវាមានចម្ងាយ ២ ២៥០ គីឡូម៉ែត្រពីដែនដីគោក ជាតំបន់ដែលស្ថិតនៅឆ្ងាយពីតំបន់រស់នៅរបស់មនុស្សបំផុត។ Bill Ailor វិស្វករអវកាសមួយរូបបានលើកឡើងថា ៖ "វាជាកន្លែងដ៏ល្អមួយសម្រាប់កប់ចោលរបស់អ្វីមួយ ដោយមិនធ្វើឲ្យប៉ះពាល់ដល់នរណាម្នាក់”។
ដើម្បីបោះចោលអ្វីមួយនៅទីកន្លែងបញ្ចុះសពនេះ ភ្នាក់ងារអវកាសត្រូវកំណត់ពេលវេលាឲ្យយានអវកាសធ្លាក់ចំទីតាំងនេះ។ វត្ថុតូចៗដូចជាផ្កាយរណបមិនត្រូវបានគេយកមកបោះចោលនៅតំបន់ Point Nemo នេះឡើយ ព្រោះថាកម្ដៅដែលកកើតឡើងពេលវាសំយុងចុះមកផែនដី ធ្វើឲ្យផ្កាយរណបឆេះបន្តិចម្ដងៗរហូតបំបែកទៅជាបំណែកតូចៗ។
ស្ថានីយអវកាស Tiangong-1
បញ្ហានោះគឺនៅត្រង់វត្ថុធំៗដូចជាស្ថានីយអវកាស Tiangong-1 ដែលជាស្ថានីយដំបូងរបស់ប្រទេសចិនយ៉ាងអ៊ីចឹង។ ស្ថានីយនេះបានបាញ់បង្ហោះនៅខែកញ្ញា ឆ្នាំ ២០១១ និងមានទម្ងន់ដល់ ៨,៥ តោន។ ប្រទេសចិនបានបាត់បង់ម្ចាស់ការលើស្ថានីយនេះកាលពីខែមីនា ឆ្នាំ ២០១៦ ហើយគេកំណត់ថាវាអាចនឹងធ្លាក់មកផែនដីនៅដើមឆ្នាំ ២០១៨។ គេមិនអាចដឹងថាស្ថានីយអវកាសនេះនឹងធ្លាក់ចំកន្លែងណានោះទេ។ ដោយសារតែប្រទេសចិនបាត់បង់ម្ចាស់ការលើស្ថានីយនេះ ដូចនេះគេមិនអាចធានាថាវានឹងធ្លាក់ចំតំបន់ Point Nemo ឡើយ។
នៅចន្លោះឆ្នាំ ១៩៧១ រហូតដល់ពាក់កណ្ដាលឆ្នាំ ២០១៦ ភ្នាក់ងារអវកាសនៅជុំវិញពិភពលោកបានបោះចោលយានអវកាសចំនួន ២៦០ គ្រឿងចូលក្នុងតំបន់នេះ។ នៅក្នុងតំបន់នេះមានដូចជាស្ថានីយអវកាស MIR កាលពីសម័យកាលសហភាពសូវៀត, យានអវកាសផ្គត់ផ្គង់សម្ភារៈរបស់រុស្សីលើសពី ១៤០ គ្រឿង, យានដឹកទំនិញរបស់ភ្នាក់ងារអវកាសអឺរ៉ុប និងមានរ៉ុកកែតរបស់ក្រុមហ៊ុន SpaceX មួយផងដែរ៕
No comments:
Post a Comment