អ្នកដែលនៅលីវ ហើយឧស្សាហ៍ចុះឡើងបរទេស ប្រហែលជាមានបំណងចង់បានគូស្នេហ៍ជាសាសន៍គេហើយ ពិតឬអត់? អ្នកប្រហែលជាស្រមៃដល់ ភាពរ៉ូមែនទិច ផ្អែមល្ហែម ប្លែកអារម្មណ៍ រវាងសម្ពន្ធភាពស្នេហាឆ្លងប្រទេសបែបនេះ ប៉ុន្តែតើអ្នកធ្លាប់គិតវាឲ្យស៊ីជម្រៅ និងល្អិតល្អន់ប៉ុណ្ណា ចំពោះបញ្ហាដែលនឹងកើតមាន ព្រោះតែភាពខុសគ្នារបស់អ្នកទាំងពីរ? បើឥឡូវនេះ អ្នកដឹងថាខ្លួនកំពុងតែលង់ស្រឡាញ់ជនបរទេស ខាងក្រោមនេះជាចំណុចសំខាន់៦យ៉ាង ដែលអ្នកគួរពិចារណា៖
១. ត្រៀមខ្លួនជាមួយទំនាក់ទំនងនៅឆ្ងាយគ្នា បានហើយឬនៅ?
វាមិនមែនជារឿងលំៗទេ អ្នកនិងគាត់នៅប្រទេសផ្សេងពីគ្នា ដូច្នេះតើអ្នកអាចទ្រាំជាមួយស្នេហាដែលឃ្លាតកាយបែបនេះយូរប៉ុណ្ណា។ វាពិតជាត្រូវការការជឿជាក់ ការអត់ធ្មត់ ការពូកែក្នុងរបៀបទាក់ទងគ្នាខ្លាំង ទើបអ្នកអាចទទួលជោគជ័យក្នុងរឿងនេះបាន។
២. តើអ្នកទាំងពីរចង់រស់នៅកន្លែងដូចគ្នាទេ?
អ្នកអាចជួបគាត់ដោយសារតែគាត់ចំណាកស្រុកមកធ្វើការនៅប្រទេសអ្នក ដូច្នេះកុំគិតម្នាក់ឯងថាក្រោយរៀបការរួចគាត់ប្រហែលចង់រស់នៅទីនេះជាមួយអ្នក។ អ្នកទាំងពីរត្រូវតែសួរគ្នាឲ្យច្បាស់ពីទីកន្លែងដែលត្រូវរស់នៅរួមគ្នា ដើម្បីបញ្ចៀសការខ្វែងគំនិតនៅពេលក្រោយ។
៣. តើអ្នកស្រឡាញ់គាត់ ជាគាត់ដែរទេ?
ពេលខ្លះ អ្នកអាចច្រឡំរវាងអារម្មណ៍ស្រឡាញ់ និងអារម្មណ៍ចង់បាន? អ្នកអាចគិតថាមានគូស្នេហ៍ជាជនបរទេស ធ្វើឲ្យអ្នកមានអារម្មណ៍ រំភើប រីករាយ ដោយសារតែរសនិយមប្លែក ឡូយ ឬភាពស៊ីវិល័យនានា របស់គាត់។ ដូច្នេះត្រូវបញ្ជាក់ខ្លួនឯងឲ្យច្បាស់ ដើម្បីបង្ការវិប្បដិសារីនៅពេលក្រោយ។
៤. តើអ្នកអាចទទួលយក វប្បធម៌ ប្រពៃណី និងសាសនារបស់គាត់បានទេ?
ជាតិសាសន៍នីមួយៗ តែងតែមានវប្បធម៌ ប្រពៃណី ជំនឿផ្សេងៗគ្នា ដូច្នេះតើអ្នកអាចទទួលយកភាពខុសគ្នានោះបានដែរឬទេ? អ្នកត្រូវដឹងថា រឿងទាំងអស់នេះនឹងជះឥទ្ធិពលចំពោះការរស់នៅ ក៏ដូចជាការចិញ្ចឹមកូនដែលអ្នកទាំងពីរនិងបង្កើតរួមគ្នានៅថ្ងៃអនាគត។
៥. តើអ្នកព្រមលះបង់ជីវិតបច្ចុប្បន្ន ដើម្បីគាត់ទេ?
ចង់ឬមិនចង់ អ្នកប្រហែលជាត្រូវចាក់ចោល គ្រួសារ មិត្តភ័ក្ដិ ការងារជាទីស្រឡាញ់របស់ខ្លួនសព្វថ្ងៃ ដើម្បីទៅរស់នៅកន្លែងឆ្ងាយជាមួយគាត់។ តើអ្នកហ៊ានលះបង់ពិភពលោកខ្លួនឯង ដើម្បីកំដរគាត់អស់មួយជីវិតទេ?
៦. ត្រៀមខ្លួនជាមួយច្បាប់បរទេស ហើយឬនៅ?
រៀបការជាមួយជនបរទេសស្របតាមផ្លូវច្បាប់មិនមែនជារឿងងាយស្រួលប៉ុន្មានទេ ហើយទទួលបានសញ្ជាតិក៏រឹតតែពិបាកមួយកម្រិតទៀត។ ប៉ុន្តែបើអ្នកពិតជាស្រឡាញ់គ្នាពិតប្រាកដមែន អ្នកប្រហែលជាមិនរួញរា ជាមួយរឿងនេះទេ ៕
No comments:
Post a Comment