គ្រូ​បង្វឹក​ថៃ ​មិន​ចង់​ជួប​វៀតណាម ​នៅ​វគ្គ​ផ្ដាច់ព្រ័ត្រ AFF Suzuki Cup

លោក​ Kiatisuk Senamuang ​គ្រូ​បង្វឹក​ក្រុម​ជម្រើស​ជាតិ​ថៃ ​បាន​លើក​ឡើង​ថា ​ក្រុម​របស់​លោក​សង្ឃឹម​ធ្វើ​បាន​ល្អ​នៅ​វគ្គ​​ពាក់​កណ្ដាល​ផ្ដាច់ព្រ័ត្រ ​និង​ឡើង​ទៅ​វគ្គ​ផ្ដាច់ព្រ័ត្រ​​ ដើម្បី​ការពារ​តំណែង​ជើង​ឯក​ AFF Suzuki Cup ​ឲ្យ​បាន ប៉ុន្តែ​នៅ​​ផ្ដាច់ព្រ័ត្រ​លោក​ចង់​ជួប​​​ក្រុម​ឥណ្ឌូណេស៊ី ជា​ជាង​ជួប​ក្រុម​វៀតណាម។

លោក​ Kiatisuk Senamuang ​គ្រូ​បង្វឹក​ក្រុម​ជម្រើស​ជាតិ​ថៃ

ថៃ ​៣​ប្រកួត​ក្នុង​ពូល​ A ​ឈ្នះ​ទាំង​៣​ប្រកួត ដោយ​ឈ្នះ​ឥណ្ឌូណេស៊ី ​៤-២, ឈ្នះ​​សិង្ហបុរី ១-០ ​និង​ឈ្នះ​​ម្ចាស់​ផ្ទះ​ហ្វីលីពីន​ ១-០ ​មាន​៩​ពិន្ទុ​ពេញ​ ឡើង​ទៅ​ប៉ះ​​​ក្រុម​លេខ​២ នៅ​ពូល​ B ​មីយ៉ាន់ម៉ា។ រីឯ​វៀតណាម ដែល​ឈ្នះ​ទាំង​៣​ប្រកួត​នៅ​ពូល​ B ​នឹង​ត្រូវ​ប៉ះ​​ក្រុម​លេខ​២ ពូល​ A ​ឥណ្ឌូណេស៊ី ​វគ្គ​ពាក់​កណ្ដាល​​ផ្ដាច់ព្រ័ត្រ ​នៅ​​​ចុង​សប្ដាហ៍​នេះ​ដូច​គ្នា សម្រាប់​ជើង​ទី​១។

Teerasil Dangda (ឈុត​ខៀវ - លេខ​១០) ខ្សែ​ប្រយុទ្ធ​ឆ្នើម​ក្រុម​ថៃ

គ្រូ​បង្វឹក​វ័យ​​៤៣​ឆ្នាំ ​ដែល​​ជួយ​ឲ្យ​ថៃ ​លើក​ពាន​ AFF Suzuki Cup ​2014 ​​បាន​និយាយ​​មុន​ប្រកួត​សំខាន់ៗ​ខាង​មុខ​នេះ​​ថា៖ "វគ្គ​ពាក់​កណ្ដាល​ផ្ដាច់ព្រ័ត្រ ​នឹង​មិន​ងាយ​ស្រួល​សម្រាប់​យើង​ឡើយ។ ប៉ុន្តែ​ដំបូង​ខ្ញុំ​សូម​អបអរ​ដល់​ឥណ្ឌូណេស៊ី និង​ថៃ ​​ដែល​ឡើង​ដល់​វគ្គ​ Semi-Finals។ ប្រហែល​ជា​យើង​ចង់​ជួប​គ្នា​ម្ដង​ទៀត ​នៅ​វគ្គ​ផ្ដាច់ព្រ័ត្រ។ ជំហាន​ដំបូង​នៅ​​វគ្គ​ចែក​ពូល​ ​យើង​ជោគជ័យ​ហើយ​ ដូច្នេះ​យើង​ត្រូវ​តែ​ខិត​ខំ​​ប្រឹងប្រែង​សម្រាប់​វគ្គ​បន្ត​​បន្ទាប់​ទៀត”៕

Le Cong Vinh ខ្សែ​ប្រយុទ្ធ​ឆ្នើម​​ក្រុម​វៀតណាម