loading...

Monday, November 28, 2016

ដឹង​អត់! អំបិល អាច​ដោះស្រាយ​បញ្ហា​សក់ យ៉ាង​មាន​ប្រសិទ្ធភាព

អំបិល ត្រូវ​បាន​គេ​ប្រើ នៅ​ក្នុង​ស្ថានភាព​ជា​ច្រើន មិន​មែន​ត្រឹមតែ​សម្រាប់​ទទួល​ទាន​ប៉ុណ្ណោះ​ទេ។ ជាក់​ស្ដែង វា​មាន​ប្រយោជន៍​ខ្លាំង​ណាស់ សម្រាប់​ដោះស្រាយ​បញ្ហា​សក់។
កម្ចាត់​ជាតិ​ប្រេង
សក់​សម្បូរ​ជាតិ​ប្រេង គឺ​ជា​លទ្ធផល​នៃ​ក្រពេញ​បញ្ចេញ​ជាតិ​ប្រេង​លើស នៅ​លើ​ស្បែក​ក្បាល។ ជា​សំណាង​ល្អ អ្នក​អាច​ដោះស្រាយ​បញ្ហា​ដ៏​គួរ​ឲ្យ​រំខាន​នេះ ដោយ​ប្រើប្រាស់​អំបិល​បាន។
អ្វី​ដែល​អ្នក​ត្រូវ​ធ្វើ គឺ​គ្រាន់​តែ​បន្ថែម​អំបិល ២ ឬ ៣ ស្លាបព្រា​បាយ ចូល​ទៅ​ក្នុង​សាប៊ូ​កក់​សក់​ដែល​អ្នក​ប្រើ រួច​យក​ទៅ​កក់​សក់ ជា​ការ​ស្រេច។ អ្នក​នឹង​សម្គាល់​ឃើញ​លទ្ធផល បើ​ទោះ​បី​ជា​អ្នក​ទើប​តែ​អនុវត្ត ២-៣​ដង​ដំបូង​ក៏​ដោយ។ សក់​របស់​អ្នក​នឹង​មាន​សុខភាព​ល្អ ដោយ​មិន​មាន​លើស​ជាតិ​ប្រេង​ទៀត​ឡើយ។
កម្ចាត់​ស្បែក​ក្បាល​មាន​អង្គែ
អង្គែ​ស្បែក​ក្បាល កើត​ឡើង​ចេញ​ពី​បំណែក​តូច​ៗ នៃ​កោសិកា​ស្បែក​ងាប់ នៅ​លើ​ស្បែក​ក្បាល។ អំបិល រំញោច​ចលនា​ឈាម​រត់ ដែល​មាន​សារៈសំខាន់​ណាស់ សម្រាប់​ជួយ​ឲ្យ​ស្បែក​ក្បាល​មាន​សុខភាព​ល្អ និង​កម្ចាត់​បំណែក​អង្គែ។ មិន​តែ​ប៉ុណ្ណោះ វា​ជួយ​ការពារ​ស្បែក​ក្បាល ពី​ការ​កើត​រោគ​ផ្សិត ទៀត​ផង។
អ្នក​គ្រាន់​តែ​រោយ​អំបិល ១ ឬ ២ ស្លាបព្រា​បាយ ទៅ​លើ​ស្បែក​ក្បាល រួច​ធ្វើ​ការ​ម៉ាស្សា ដោយ​ប្រើ​ម្រាម​ដៃ​សើម រយៈ​ពេល​ប្រហែល ១០​នាទី ហើយ​លាង​សម្អាត​ចេញ​ធម្មតា ជា​ការ​ស្រេច។
ជួយ​បណ្ដុះ​សក់
មនុស្ស​មិន​ច្រើន​ទេ ដែល​បាន​ដឹង​ថា អំបិល​សមុទ្រ​មាន​ប្រយោជន៍​សម្រាប់​ការ​បណ្ដុះ​សក់។ ប្រសិន​បើ​អ្នក​មាន​ជំងឺ​ទំពែក ដូចជា ជ្រុះ​សក់ អ្នក​អាច​ប្រើ​អំបិល​សមុទ្រ ដើម្បី​ជំរុញ​ការ​លូត​លាស់​នៃ​សក់​តាម​បែប​ធម្មជាតិ។
អ្នក​គ្រាន់​តែ​លាង​សម្អាត​សក់​ធម្មតា រួច​ធ្វើ​ការ​ម៉ាស្សា​ស្បែក​ក្បាល​សើម ជា​មួយ​អំបិល​សមុទ្រ រយៈ​ពេល ១០ ទៅ ១៥​នាទី ហើយ​លាង​សម្អាត​សក់​របស់​អ្នក​ចេញ​ម្ដង​ទៀត ជា​ការ​ស្រេច។ អនុវត្ត​វិធីសាស្ត្រ​បែប​ធម្មជាតិ​នេះ ២​ដង ក្នុង​១​សប្តាហ៍ អ្នក​នឹង​ឃើញ​លទ្ធផល​គួរ​ឲ្យ​ភ្ញាក់ផ្អើល៕

No comments:

Post a Comment