ជនជាតិឥណ្ឌូណេស៊ី ៨នាក់ត្រូវបានកាត់ទោសឲ្យជាប់ពន្ធនាគារចន្លោះពី ១៥ទៅ១៨ឆ្នាំ ដោយតុលាការម៉ាឡេស៊ីក្រោយលួចកប៉ាល់ដឹកប្រេងមួយគ្រឿងកាលពីឆ្នាំមុន។ នេះបើតាមមន្ត្រីម៉ាឡេស៊ីម្នាក់បានប្រាប់ឲ្យដឹងនៅថ្ងៃច័ន្ទនេះ។
កប៉ាល់ដឹកប្រេងមានឈ្មោះថា MT Orkim Harmony ពេលនោះបានដឹកប្រេងឥន្ធនៈប្រមាណ ៦០០០តោន បើគិតជាទឹកប្រាក់ប្រហែល ៥,៦លានដុល្លារអាមេរិក ត្រូវបានរឹបអូសដោយអ្នកទាំង៨ នៅថ្ងៃទី ១១មិថុនា ឆ្នាំ២០១៥។
កប៉ាល់ខាងលើ បានធ្វើដំណើរពីឆ្នេរសមុទ្រភាគខាងលិចប្រទេសម៉ាឡេស៊ី ទៅកាន់កំពង់ផែ Kuantan ឆ្នេរភាគខាងកើត។
៦នាក់ក្នុងចំណោម៨នាក់ ត្រូវកាត់ទោសឲ្យជាប់គុក ១៥ឆ្នាំ វាយ៥ខ្សែតី និង២នាក់ទៀតត្រូវជាប់ ១៨ឆ្នាំក្នុងម្នាក់ៗ។ នេះបើតាមភ្នាក់ងារអនុវត្តច្បាប់ផ្លូវសមុទ្រម៉ាឡេស៊ីម្នាក់។ លោកបន្ថែមថា ជនជាតិឥណ្ឌូណេស៊ីទាំងនោះ បានសុំការលើកលែងទោសដែរ ក្រោយត្រូវចោទប្រកាន់ជាផ្លូវការកាលពីថ្ងៃអាទិត្យម្សិលមិញនៅរដ្ឋ Johor។
ជនសង្ស័យទាំង ៨នាក់ បានរត់គេចចេញពីកម្លាំងសន្តិសុខតាមអូប័រជួយសង្គ្រោះ ក្រោយនាវាចម្បាំងប្រដេញស្ទាក់ចាប់ពួកគេ តែរត់មិនរួច។ ចំណែកសមាជិកនាវិក ២២នាក់ដែលនៅលើកប៉ាល់ប្រេងភាគច្រើនសុទ្ធតែរងរបួស ព្រោះត្រូវជនជាតិឥណ្ឌូណេស៊ីបាញ់ចំភ្លៅទៀតផង៕
No comments:
Post a Comment