ក្រៅពីអង្គរវត្ត និង ប្រាង្គប្រាសាទជាច្រើននោះ សារមន្ទីរប្រវត្តិសាស្ត្រសង្គ្រាម នៅភូមិកសិកម្ម សង្កាត់ស្រង៉ែ ក្រុង/ខេត្ត សៀមរាប មានផ្ទុកនៅអាវុធយុទ្ធភណ្ឌដែលសេសសល់តាំងពីឆ្នាំ ១៩៧០ រហូតដល់ ១៩៩៩ កំពុងទាក់ទាញភ្ញៀវទេសចរទាំងជាតិ និង អន្តរជាតិចូលទស្សនាជាហូរហែ ដើម្បីស្វែងយល់អំពីសំណល់សង្គ្រាមទាំងនេះ។
លោក ម៉េង រដ្ឋា អ្នកនាំភ្ញៀវប្រចាំសារមន្ទីរប្រវត្តិសាស្ត្រសង្គ្រាម បាននិយាយថា សារមន្ទីរនេះបានប្រមូលអាវុធយុទ្ធភណ្ឌជាច្រើនតាំងពីទសវត្ស ៧០ រហូតដល់ ទសវត្ស៩០ ដើម្បីរក្សាទុក និងទុកឲ្យភ្ញៀវអាចស្វែងយល់ពីសំណល់សង្គ្រាមផង និងជាពិសេសដឹងអំពីប្រវត្តិសាស្ត្រកម្ពុជាក្នុងរបបកម្ពុជាប្រជាធិបតេយ្យ។ "ការរក្សាទុកអាវុធយុទ្ធភណ្ឌទាំងនេះដើម្បីឲ្យកូនខ្មែរបានដឹង និងមិនចង់ឲ្យវិលទៅរកភ្នក់ភ្លើងសង្គ្រាមសាជាថ្មី"។
អ្នកនាំភ្ញៀវរូបនេះបន្តទៀតថា សំណល់សង្គ្រាមទាំងនោះមានដូចជា គ្រាប់មីន, រថក្រោះ, កាំភ្លើងបាញ់យន្តហោះ, រ៉ុកកែត, កាំភ្លើង AK កាំភ្លើង អឹមសី, M16, បេ, យន្តហោះប្រដេញ និង ឧទ្ធម្ភាគចក្រជាដើម។
សូមទស្សនារូបភាពនៃអាវុធយុទ្ធភណ្ឌដែលសេសល់ពីសម័យសង្គ្រាម ដូចខាងក្រោម៖
សារមន្ទីរប្រវត្តិសាស្ត្រសង្គ្រាមស្ថិតនៅភូមិកសិកម្ម សង្កាត់ស្រង៉ែ ក្រុង-ខេត្ត សៀមរាប ចាប់ផ្ដើមសាងសង់ឆ្នាំ ១៩៩៩ រហូតដល់ឆ្នាំ ២០០១ ទើបបើកឲ្យដំណើរការ លើទំហំដី ប្រមាណជា ៣ហិកតារ។ នៅក្នុងសារមន្ទីរក្រៅពីតាំងបង្ហាញអាវុធយុទ្ធភណ្ឌដែលសេសសល់ពីសំណល់សង្គ្រាមក៏មានរូបថតអមដោយសំណេរខ្លីៗរៀបរាប់អំពីព្រឹត្តិការណ៍ដែលបានកើតឡើងនៅអំឡុងសង្គ្រាមផងដែរ៕
ប្រភព៖ Sabay
No comments:
Post a Comment