ការសិក្សាក្រេបយកចំណេះវិជ្ជា គឺជាស្ពានចម្លងជីវិតឱ្យឆ្ពោះទៅរកភាពល្អប្រសើរក្នុងជីវិត តែមនុស្សខ្លះមានកាយសម្បទាគ្រប់គ្រាន់ មានលទ្ធភាព មានគ្រួសារជួយជ្រោមជ្រែងតែបែរជាមិនយល់ពីតម្លៃនៃការសិក្សា ហើយចំណាយពេលលើរឿងមិនសូវមានប្រយោជន៍ទៅវិញ។ ដូច្នេះសូមមកស្គាល់យុវសិស្ស ៣រូបខាងក្រោមនេះ ថ្វីត្បិតមានកាយសម្បទាមិនគ្រប់គ្រាន់ មានជីវភាពខ្វះខាត តែពួកគេ ខិតខំតស៊ូក្នុងជីវិត តាមរយៈការប្រឡងមធ្យមសិក្សាទុតិយភូមិទាំងលំបាកគួរឱ្យសរសើរ។
១. យុវជន រ័ត្ន តុលា
ថ្វីត្បិតពិការដៃ និងជើងទាំងសងខាងតែយុវជនរូបនេះ នៅតែប្រឹងប្រឡងបាក់ឌុបទោះបីធ្លាប់ធ្លាក់ម្ដងរួចមកហើយ ព្រោះចង់សម្រេចគោលបំណងធំក្នុងជីវិត។ តុលាប្រាប់ Sabay ថារូបគេមានគោលបំណងចង់សិក្សាផ្នែកព័ត៌មានវិទ្យា នៅសាកលវិទ្យាល័យ ប្រសិនបើមានអ្នកជួយជ្រោមជ្រែង។ តុលា ជាកូនកំព្រាមិនដែលស្គាល់មុខឪពុកម្ដាយឡើយ តែរូបគេមិនអស់សង្ឃឹមក្នុងជីវិត តែមានការតស៊ូពុះពារ ទោះមានកាយសម្បទាមិនគ្រប់គ្រាន់ដូចអ្នកដទៃក៏ដោយ។
២. យុវតី ឌុក ឆវី
យុវតីកម្សត់រូបនេះពិការដៃទាំងសងខាង ហើយសរសេរវិញ្ញាសាដោយជើងទាំងពីររបស់ខ្លួន នៅមណ្ឌល នេត យ៉ង់ ក្នុងខេត្តបាត់ដំបង។ ទោះជាលំបាកយ៉ាងណាក្ដីតែយុវតីរូបនេះ បានខិតខំប្រឡងរហូតដល់ថ្ងៃបញ្ចប់ ប្រកបដោយស្នាមញញឹម និងភាពជឿជាក់។
រូបភាព៖ ក្រសួងអប់រំ
៣. យុវជនពិការភ្នែកទាំងសងខាង
ដោយឡែកយុវជនម្នាក់នេះ ពិការភ្នែកទាំងសងខាង តែតស៊ូខិតខំរៀនរៀនសូត្រ រហូតមានឈ្មោះទៅប្រឡងមធ្យមសិក្សាទុតិយភូមិនឹងគេ នៅមណ្ឌលសាលាបឋមសិក្សា នរោត្ដម រាជធានីភ្នំពេញ។ នេះបើតាមទំព័រហ្វេសប៊ុករបស់ក្រសួងអប់រំ៕
រូបភាព៖ ក្រសួងអប់រំ
ប្រភព៖ Sabay
No comments:
Post a Comment