អត្ថបទមុន Sabay បង្ហាញពីការពិនិត្យមើល iPhone ក្លែងក្លាយ (Clone) និងរបស់ពិត (Original) ដែលកំពុងរីករាលដាលយ៉ាងខ្លាំងពេញទីផ្សារក្នុងស្រុក។ ងាកមកអត្ថបទថ្មីនេះវិញ មិនថាតែទូរសព្ទ Galaxy S8/S8+ របស់ SAMSUNG ក៏មានក្រុមហ៊ុនក្រៅស្រុកផលិតជារបស់ក្លែងក្លាយមកចែកចាយលក់ផងដែរ។
តាមទីផ្សារ Online ក្រៅស្រុក Sabay សង្កេតឃើញមានលក់ហូរហែចន្លោះពី ៩០ ទៅជាង ២០០ ដុល្លារ ចំណែកទីផ្សារក្នុងស្រុកយើងវិញ ឃើញមានទំព័រហ្វេសប៊ុកមួយប្រកាសលក់ក្នុងតម្លៃ ១៩៩ ទៅ ២៣៩ ដុល្លារ។ បើគេប្រាប់ការពិតថារបស់នោះក្លែងក្លាយវាមិនជាបញ្ហាចោទទេ ប៉ុន្តែបើប៉ះជនខិលខូចកុហកយើងថាជារបស់ពិតចេញពីក្រុមហ៊ុន នោះទើបជារឿងស៊យធំសម្រាប់យើងរាល់គ្នា។
ធម្មតាពពួកម៉ាស៊ីន Clone នៃត្រកូល Galaxy យើងមិនអាចប្រើវិធីសាស្ត្រពិនិត្យបែប iPhone បានឡើយ ព្រោះទាំងដំណើរការនិងរូបរាងសឹងតែដូចគ្នា ១០០ ភាគរយ។
+ដើម្បីឲ្យអ្នកបែងចែកដាច់ស្រេចរវាង Galaxy S8 ពិតឬក្លូន ត្រូវមើលដូចតទៅ
- កុំមើលកន្លែងកំណត់ភាសា អ្នកខ្លះគិតថា របស់ពិតមានភាសាខ្មែរនិងរបស់ក្លែងក្លាយគ្មានភាសាខ្មែរទេ (ការកំណត់ភាសាគេអាចកែបានយ៉ាងស្រួល)
- របស់ក្លែងក្លាយប៊ូតុង Bixby មិនដំណើរការ
- មើលរន្ធដោត បើរបស់ពិតមានរន្ធដោតជាប្រភេទ USB Type C ដែលខ្សែសាកទូរសព្ទ Android ស៊េរីចាស់មិនអាចដោតចូលបានឡើយ ដរាបណាយើងប្រើខ្សែ USB ស៊េរីថ្មីដែរ (របស់ក្លែងក្លាយប្រើរន្ធដោតធម្មតាឬ Micro USB)
- ល្បឿនបើកម៉ាស៊ីន Galaxy S8 ពិតប្រាកដលឿនរហ័ស របស់ក្លែងក្លាយយឺតមែនទែន
- របស់ក្លែងក្លាយគ្រាប់ Flash LED បង្ហាញខុសទីតាំងនិងឃើញច្បាស់
- ទ្រនាប់ស្កេនខ្ចៅដៃរបស់ក្លែងក្លាយគ្រាន់តែដាក់បញ្ឆោត ទោះអ្នកដាក់ម្រាមខុសក៏ស្កេនបានដែរ
- កម្រិតបង្ហាញជះពីអេក្រង់នៅមានកម្រិត ព្រោះរបស់ក្លែងក្លាយប្រើអេក្រង់ LCD ធម្មតាខុសពីរបស់ពិតប្រើអេក្រង់ OLED
- S8 ពិតប្រាកដដំណើរការ Android 7.0 ចេញពីប្រអប់ទាំងអស់ បើរបស់ក្លែងក្លាយម៉ាស៊ីនខ្លះនៅដំណើរការ Android 6.0។
រីករាយទស្សនាវីដេអូខាងក្រោម:
+តើអ្នកគួរទិញប្រើប្រាស់ដែរឬទេ?
ជៀសវាងពីការទិញប៉ះរបស់ក្លែងក្លាយ អ្នកគួរទៅទិញដោយផ្ទាល់ពីទីតាំងជាក់លាក់ណាមួយ ហើយអនុវត្តតិចនិកពិនិត្យដូចបានរៀបរាប់ខាងលើនិងជាធម្មតា S8 ពិតប្រាកដ រមែងមានប័ណ្ណធានាចេញពីក្រុមហ៊ុន SAMSUNG ផ្ទាល់តែម្ដង។ ប៉ុន្តែប្រសិនបើអ្នកចង់ទទួលបានបទពិសោធន៍កាន់ស្មាតហ្វូនដែលមានរាងដូច Galaxy S8 អ្នកមិនគួរចំណាយលើ ១០០ ដុល្លារឡើយ ដោយអ្នកអាចសាកល្បងទិញប្រើត្រឹមតែរបស់ Clone ក្រោម ១០០ ដុល្លារគឺល្អបំផុត បើថ្លៃលើនោះ អ្នកគួរយកថវិកាដ៏មានតម្លៃទៅទិញទូរសព្ទផ្សេង ទោះបីខ្លះមានរូបរាងដែលអ្នកមិនពេញចិត្ត ប៉ុន្តែអាចប្រើដោយទំនុកចិត្ត និងមានការធានាច្បាស់លាស់ចេញពីក្រុមហ៊ុនក្នុងស្រុក។
ប្រភព៖ sabay
No comments:
Post a Comment