កាលពីពេលថ្មីៗនេះ មេដឹកនាំកូរ៉េខាងជើង លោក គីម ជុងអ៊ុន បានធ្វើដំណើរទស្សនកិច្ចជុំវិញរោងចក្រគ្រឿងសម្អាងមួយ ជាមួយភរិយាយ៉ាងកម្របំផុត។
លោក គីម ជុងអ៊ុន បានធ្វើទស្សនកិច្ចរោងចក្រផលិតគ្រឿងសម្អាងមួយ នៅក្នុងទីក្រុងព្យុងយ៉ាង ជាមួយភរិយា គឺលោកស្រី Ri Sol-ju ដោយបានអំពាវនាវដល់ស្រ្តីនៅក្នុងប្រទេស ឲ្យមានសម្រស់កាន់តែស្រស់ស្អាតបន្ថែមទៀត។
គួរឲ្យដឹងថា នៅក្នុងរូបថតរបស់មេដឹកនាំកូរ៉េខាងជើង គេបានសង្កេតឃើញថា លោកស្រី Ri Sol-ju បានអវត្តមានច្រើននៅក្នុងឆ្នាំ២០១៧ ដោយគេជឿជាក់ថា លោកស្រីបានផ្តល់កំណើតដល់កូនទី៣។ ទោះជាយ៉ាងណា លោកស្រីត្រូវបានគេប្រទះឃើញ ជាលើកដំបូងនៅខែកក្កដា ខណៈពេលដែលលោកស្រី និង លោក គីម ជុងអ៊ុន បានចូលរួមពិធីជប់លៀង ដើម្បីអបអរសាទរការបាញ់សាកល្បងមីស៊ីលឆ្លងទ្វីប ICBM បានជោគជ័យ។
ជាមួយគ្នានេះដែរ លោកស្រី Ri Sol-ju ក៏បានបង្ហាញខ្លួន កាលពីខែកញ្ញា កន្លងទៅនេះ នៅឯពិធីជប់លៀងមួយ ដើម្បីអបអរសាទរអ្នកបច្ចេកទេសនុយក្លេអ៊ែរ របស់លោក គីម ជុងអ៊ុន ដែលបានដឹកនាំការធ្វើតេស្តនុយក្លេអ៊ែរធំបំផុតលើកទី៦ របស់ប្រទេសនេះផងដែរ។
របាយការណ៍មួយចំនួន បានឲ្យដឹងថា លោក គីម ជុងអ៊ុន និង លោកស្រី Ri Sol-ju បានរៀបការនៅក្នុងឆ្នាំ២០០៩៕
No comments:
Post a Comment