អ្នកខ្លះតែងនិយាយថាពេលកំពុងសិក្សាយុវវ័យមិនគួរមានស្នេហានោះទេ ដោយសារអាចប៉ះពាល់ដល់ការសិក្សា ឬ ធ្វើឱ្យយុវវ័យភ្លេចការរៀនសូត្រជាដើម។ ប៉ុន្តែក៏មានយុវវ័យមួយចំនួនមិនយល់ស្រប ចំពោះការលើកឡើងបែបនេះដែរ ដោយពួកគាត់សំអាងលើហេតុផលមួយចំនួន ដែលបង្ហាញថា ស្នេហាក៏មានផលប្រយោជន៍ពេលកំពុងសិក្សា។ ខាងក្រោមនេះគឺជាចំណុចសំខាន់ៗដែលជាការលើកឡើងរបស់យុវវ័យមួយចំនួន៖
១. ជួយឱ្យខិតខំប្រឹងប្រែងរៀនសូត្រជាងមុន៖
ទាក់ទងនឹងចំណុចនេះ កញ្ញា រស្មី ដែលជានិស្សិតឆ្នាំទីបី ជំនាញ International business បានបញ្ចេញទស្សនៈផ្ទាល់ខ្លួនថា៖ នៅត្រង់ចំណុចនេះមានន័យថា កាលណាយុវវ័យមានស្នេហាអាចឱ្យគាត់ខិតខំរៀនសូត្រជាងពីមុន ដើម្បីឱ្យមនុស្សជាទីស្រឡាញ់របស់គាត់មើលឃើញ ពីការខិតខំរបស់គាត់។ ជាពិសេសដោយសារតែមនុស្សជាទីស្រឡាញ់របស់គាត់ ទើបធ្វើឱ្យគាត់កាន់តែមានកម្លាំងចិត្តបន្ថែមទៀតក្នុងការសិក្សារៀនសូត្រ ដោយដៃគូររបស់គាត់ជួយជំរុញលើកទឹកចិត្ត។ ដូចនេះ ស្នេហាក៏អាចធ្វើឱ្យយុវវ័យទទួលផលប្រយោជន៍តាមរយៈរូបភាពនេះផងដែរ។
២. បង្រៀនឱ្យយុវវ័យចេះផ្លាស់ប្ដូរអត្តចរិត៖
រស្មីដដែលបានបន្តទៀតថា៖ "មួយវិញទៀតស្នេហាអាចធ្វើឱ្យ យើងផ្លាស់ប្ដូរអត្តចរិត ពីចរិតក្មេង ទៅជាមនុស្សចេះគិតគូរ និងចាស់ទុំជាងមុន។ ព្រោះដើម្បីមនុស្សដែលយើងស្រឡាញ់ យើងតែងចង់ឱ្យគេពេញចិត្តនូវអ្វីដែលយើងមាន ដូចថា ពីមុនយើងគ្រាន់តែជាក្មេងអាឡិអាឡក់ម្នាក់ តែពេលយើងមានស្នេហា យើងចេះរៀនធ្វើម្ហូប ធ្វើការងារផ្ទះ និងការងារស្រ្ដីផ្សេងៗទៀតដើម្បីបង្ហាញឱ្យដៃគូររបស់យើងគាត់ពេញចិត្ត"។
បន្ថែមលើចំណុចនេះទៀត ណារដ្ឋ ជាសិស្សកំពុងរៀននៅវិទ្យាល័យបាក់ទូកយល់ឃើញថា៖ "ជួនកាលអ្នកខ្លះឪពុកម្ដាយ និយាយមិនស្ដាប់ទេ តែនៅពេលដែលមានស្នេហាបែរជាខិតខំរៀន ព្រោះស្រឡាញ់នារីម្នាក់នឹងខ្លាំង គេឱ្យធ្វើអីក៏ព្រមដែរ ដូចជាប្រាប់ឱ្យខំរៀន ឈប់ដើរលេង អីចឹងទៅ។ ដូចនេះខ្ញុំគិតថាស្នេហាក៏មានចំណុចល្អដែរចំពោះយុវវ័យពេលកំពុងសិក្សា"។
៣. មានគោលដៅច្បាស់លាស់ក្នុងជីវិត៖
នៅត្រង់ចំណុចនេះដែរ ណារដ្ឋ បាននិយាយថា៖ "បាទបងស្នេហាបង្រៀនយើងឱ្យចេះ កំណត់គោលដៅច្បាស់លាស់ ឧទាហរណ៍ថា យើងស្រឡាញ់គ្នាជាសិស្សដូចគ្នា ចឹងយើងចាប់ផ្ដើមចេះគិតថា តើធ្វើយ៉ាងម៉េចទើប ស្រឡាញ់គ្នា មានអនាគតល្អ មានការគាំទ្រពីគ្រួសារ ដូច្នេះយើងគួររៀបចំផែនការយ៉ាងណាខ្លះក្នុងជីវិត។ ដូចនេះមានតែខិតខំប្រឹងប្រែងរៀនសូត្រឱ្យចប់ចុងចប់ដើម ស្វែងរកការងារធ្វើទាំងពីរនាក់ ឬរួមគ្នាបង្កើតអាជីវកម្មអ្វីមួយ។ កត្តាទាំងអស់នេះហើយដែលជួយជំរុញឱ្យយើងមានកម្លាំងចិត្តត្រូវតែតស៊ូដើម្បីឱ្យស្នេហាមួយទទួលជោគជ័យ"។
៤. មានអ្នកជួយផ្ដល់កម្លាំងចិត្ត និងប្រឹក្សាយោបល់៖
កណ្ណិកា យុវតីកំពុងមានស្នេហារូបនេះបានលើកឡើងថា៖ "ចា.... ជាការពិតបងមិនមែនអ្នកមានស្នេហាពេលកំពុងរៀនសុទ្ធតែមិនល្អនោះទេ។ ដូចជាខ្ញុំជាដើមនៅពេលមិនសប្បាយចិត្ត ឬ ជួបបញ្ហាក្នុងការសិក្សា ខ្ញុំមានមនុស្សជាទីស្រឡាញ់របស់ខ្ញុំជួយផ្ដល់ជាកម្លាំងចិត្តនិយាយពាក្យល្អៗ ដែលធ្វើឱ្យខ្ញុំមានកម្លាំងចិត្តតទៅទៀត។ ហើយមួយវិញទៀតបង នៅពេលដែលយើងចង់សម្រេចចិត្តអ្វីមួយចឹង គាត់អាចជួយប្រឹក្សាយោបល់ជូនយើង ដូចជាសង្សារខ្ញុំចឹង គាត់មានបទពិសោធន៍ និងចំណេះដឹងច្រើនជាងខ្ញុំដូចនេះ ពេលខ្លះគាត់អាចរកដំណោះស្រាយយ៉ាងល្អជូនខ្ញុំទៀតផង"។
៥. ជៀសវាងប្រព្រឹត្តិអំពើមិនល្អក្នុងសង្គម៖
ណារដ្ឋ បានលើកឡើងទាក់ទងនឹងចំណុចនេះថា៖ "ចំណុចនេះគឺមានន័យថា នៅពេលដែលយើងមានស្នេហា យើងចំណាយពេលតែជាមួយមនុស្សដែលយើងស្រឡាញ់តែប៉ុណ្ណោះ ហើយមិត្តភក្ដិដែលមិនល្អក៏យើងគ្មានពេលទៅជួបពួកគេទៀតដែរ។ ជាពិសេសមនុស្សជាទីស្រឡាញ់របស់យើង មិនចង់ឃើញយើងធ្វើរឿងមិនល្អនោះទេ តែងនាំយើងដើរផ្លូវល្អ ដូចនេះនៅពេលយើងមានស្នេហាជាមួយបុគ្គលដែលមានចំណេះដឹង គឺអាចជួយយើងស្វែងរកអនាគតដ៏ល្អបាន"។
No comments:
Post a Comment