ក្មេង​អាយុ​៣​ឆ្នាំមុជ​​ចូល​ទឹក​សមុទ្រជម្រៅ​ជិត​១០​ម៉ែត្រ កំពុង​ទទួល​ការ​ចាប់​អារម្មណ៍​ខ្លាំង

វីដេអូ​ឃ្លិប​មួយ​ខ្សែ ដែល​បង្ហាញ​ឲ្យ​ឃើញក្មេង​ប្រុស​អាយុ​ទើប​តែ​៣​ឆ្នាំ​ម្នាក់ហែល​ច្រមុជ​ទឹក​សមុទ្រ​ជម្រៅ ជិត​១០​ម៉ែត្រ កំពុង​តែ​ទទួល​បាន​ការ​ចាប់​អារម្មណ៍​យ៉ាង​ខ្លាំង។

ក្មេង​ប្រុស​ដ៏​អង់អាច​ក្លាហាន​ខាង​លើ មាន​ឈ្មោះ​ថា Fedor Afonasiev បាន​ប្រឡូក​ខ្លួន ក្នុង​ការ​ហែល​មុជ​ទឹក តាំង​ពី​អាយុ​២​ឆ្នាំ​មក​ម្ល៉េះ ដោយ​ដើរ​តាម​គន្លង​ឪពុក​ម្ដាយ ដែល​ជា​អ្នក​ចូលចិត្ត​ការ​ផ្សង​ព្រេង។

ក្នុង​នោះ​ដែរ Fedor បាន​មុជ​ចូល​ទៅ​ក្នុង​អន្លង់​ទឹក​សមុទ្រ ដែល​មាន​ឈ្មោះ​ថា Blue Hole នៃ​ដៃ​សមុទ្រ Red Sea ដែល​ស្ថិត​ក្នុង​ទ្វីប​អាហ្វ្រិក តែ​ម្នាក់​ឯង​ទៀត​ផង ដែល​មើល​ទៅ​ពិត​ជា​អស្ចារ្យ​មែន​ទែន។

ជា​មួយ​គ្នា​នេះ​ដែរ Fedor ដែល​មាន​ឪពុក​ម្តាយ ជា​អ្នក​បង្ហាត់​ឲ្យ​ចេះមុជក្នុង​​ទឹក ក៏​បាន​ជិះ​លើ​ខ្នង​ឪពុក​ម្ដាយ ដើម្បី​ហែល​មុជ​ទឹក​ជា​មួយ​គ្នា​ផង​ដែរ។

វីដេអូ​ឃ្លិប​ដែល​បង្ហាញ​ពី​សកម្មភាព​ហែល​ច្រមុជ​ទឹក​ដ៏​អស្ចារ្យ របស់ Fedor ត្រូវ​បាន​ថត​ដោយ អ្នក​ជំនាញ​ច្រមុជ​ទឹក​រុស្ស៊ី វ័យ​២៩​ឆ្នាំ មាន​ឈ្មោះ​ថា Alexey Molchanov មក​ពី​ទីក្រុង​មូស្គូ ប្រទេស​រុស្ស៊ី។

ក្នុង​នាម​ជា​អ្នក​ហែល​ច្រមុជ​ទឹក ដែល​មាន​បទពិសោធន៍​ម្នាក់ លោក Alexey អាច​អត់​ដង្ហើម រហូត​ដល់​ទៅ ៨​នាទី​កន្លះ។ អ្នក​ជំនាញ​រូប​នេះ បាន​កាន់​កំណត់ត្រា​ពិភពលោក​មួយ​ក្នុង​ដៃ ដោយ​អាច​ច្រមុជ​ទឹក​ជម្រៅ ១២៩​ម៉ែត្រ ដោយ​ប្រើ​ស្បែក​ជើង​ព្រុយ​ត្រី៕