ប្រិយមិត្តប្រាកដជាស្គាល់ហើយយុវតី ស៊ន ចាន់ធីតា ដែលកាលពីដើមឆ្នាំ២០១៧នេះ នាងបានចូលប្រឡងក្នុងកម្មវិធីដ៏ធំមួយ ដើម្បីចូលផលិតកម្មចម្រៀងយក្ស SM របស់កូរ៉េ តែមិនបានទទួលលទ្ធផលល្អឡើយ។
ដោយមិនបោះបង់ក្ដីស្រមៃចង់ក្លាយជាតារា K-Pop ពេលថ្មីៗនេះ នាងបានដាក់ពាក្យប្រកួតកម្មវិធីមួយទៀតដែលមានឈ្មោះថា "Rising Legends Season2” ដែលរៀបចំឡើងដោយគេហទំព័រ Soompi និងសហការជាមួយផលិតកម្ម Cube Entertainment។
កម្មវិធីនេះបានបើកឲ្យបេក្ខជនពីគ្រប់ទិសទីចូលរួមប្រកួត ដោយគ្រាន់តែផ្ញើជាវីដេអូបង្ហាញសមត្ថភាព ដូចជា ច្រៀង រាំ និងរ៉េប ហើយជុំដំបូងនេះនឹងដាក់ពិន្ទុដោយមហាជន ពោលគឺវីដេអូណាដែលទទួលបានការចូលមើលច្រើនជាងគេនឹងឈ្នះ។
សម្រាប់កម្មវិធីនេះ ធីតា បានឲ្យដឹងថានេះជាលើកទី២ហើយដែលនាងបានចូលរួម ហើយវីដេអូសមត្ថភាពដែលផ្ញើទៅគឺរាំ។ គិតមកដល់ពេលនេះ ធីតា កំពុងឈរក្នុងលំដាប់ថ្នាក់លេខ៥ ក្នុងចំណោមបេក្ខជនទាំងអស់ដែលមានចំនួន១៦៤៥រូប។ សម្រាប់តែវិញ្ញាសារាំគឺនាងឈរនៅលំដាប់ទី១តែម្ដង។
យុវតីមកពីខេត្តព្រះសីហនុរូបនេះ បានឲ្យដឹងថា នាងមិនទាន់ជឿជាក់ថាខ្លួនអាចទទួលបានជោគជ័យទេ ព្រោះបើឆ្លងផុតវគ្គនេះ នាងត្រូវបន្តបោះជំហាន៣ដំណាក់កាលទៀត ដោយមានការដាក់ពិន្ទុពីគណៈកម្មការ។
នាងបញ្ជាក់ថា មានតែម្នាក់ប៉ុណ្ណោះដែលនឹងក្លាយជាម្ចាស់ជយលាភីនៃកម្មវិធីនេះ ហើយអ្នកឈ្នះនឹងបានធ្វើដំណើរកម្សាន្តទៅកូរ៉េដោយឥតគិតថ្លៃ និងទទួលបានឱកាសចូលរួមការប្រកួតនៅក្រុមហ៊ុន Cube Entertainment ដោយផ្ទាល់តែម្ដង។
គ្រួសារ Cube Entertainment
Cube Entertainment ធ្លាប់ជាជម្រករបស់តារា K-Pop ល្បីៗដូចជា 4Minute, B2ST, Apink និង Rain ជាដើម។ សម្រាប់បច្ចុប្បន្នមានដូចជា HyunA, BTOB, CLC, Pentagon, Triple H និង Trouble Maker ជាដើម៕
ប្រភព៖ Sabay
No comments:
Post a Comment