ការរៀបការគឺជារឿងដ៏សំខាន់នៅក្នុងជីវិត ដូច្នេះហើយស្គាល់គូស្នេហ៍របស់អ្នកច្បាស់អាចឲ្យអ្នកទទួលបានសុភមង្គល និងរស់នៅដោយមិនសូវមានទុក្ខកង្វល់ក្រោយរៀបការរួច។ យ៉ាងណាមិញ ក្រៅពីអត្តចរិតរបស់គាត់ នៅមានចំណុចសំខាន់ មួយចំនួន ដែលមនុស្សស្រីមិនត្រូវមើលរំលង មុននឹងសម្រេចចិត្តចងចំណងស្នេហ៍មួយនេះជាផ្លូវការ។ ចំណុចទាំងនោះមានដូចជា៖
១. ដឹងស្ថានភាពហិរញ្ញវត្ថុរបស់គាត់ច្បាស់
អ្នកមិនអាចរៀបការទាំងមិនដឹងថា ចំណូលប្រចាំខែរបស់គាត់ប៉ុណ្ណា ហើយតើគាត់អាចមានសមត្ថភាពចិញ្ចឹមគ្រួសារថ្មីមួយបានឬអត់។ ប្រសិនបើរៀបការហើយអ្នកទើបដឹងថាគាត់មានបំណុលជាប់ខ្លួនរាប់ម៉ឺនដុល្លារ វាពិតជារឿងដែលតក់ស្លុត នឹងពិបាកទទួលយកណាស់។ ដូច្នេះ អ្នកទាំងពីរគួរស្មោះត្រង់ចំពោះបញ្ហានេះ។
២. គំនិតក្នុងការយកកូន
ត្រូវប្រាកដថាអ្នកធ្លាប់បានពិភាក្សាគ្នាជាមួយគាត់ រឿងបញ្ហាយកកូនក្រោយពេលរៀបការ។ ប្រសិនបើក្តីស្រមៃគាត់ចង់បានកូន១០នាក់ ឫកូនប្រុសសុទ្ធ ហើយផ្ទុយស្រឡះពីអ្វីដែលអ្នកចង់បាន អ្នកទាំងពីរចាំបាច់ត្រូវសម្របសម្រួលគ្នា ដើម្បីទទួលបានការសម្រេចជារួមមួយ។
៣. ដឹងពីប្រវត្តិជំងឺរបស់គាត់
វាសំខាន់ខ្លាំងណាស់។ អ្នកត្រូវដឹងអំពីប្រវត្តិជំងឺរបស់គាត់ និងគ្រួសារគាត់។ វាមិនមែនជារឿងអាក្រក់ ដែលអ្នកត្រូវខ្លាចគាត់អន់ចិត្តទេ ប៉ុន្តែអ្នកក៏មានសិទ្ធិត្រូវដឹងថាតើអនាគតប្តី និងកូនរបស់អ្នកអាចប្រឈមជាមួយជំងឺតំណពូជអ្វីខ្លះ។
៤. តើគាត់ញៀនជាមួយរឿងអាសអាភាសឬអត់
ការញៀនជាមួយរឿងទាំងអស់នេះខ្លាំងធ្វើឲ្យមានផលប៉ះពាល់ដល់ ជីវិតក្រោយរៀបការរបស់អ្នក។ ដូច្នេះអ្នកទាំងពីត្រូវស្មោះត្រង់ និងស្វែងរកវិធីដោះស្រាយកែប្រែទម្លាប់ប្រសិនបើគាត់សារភាពប្រាប់អ្នកនូវរឿងពិត។
៥. ដឹងពីវិន័យគ្រួសារដែលគាត់ធ្លាប់ឆ្លងកាត់កាលពីកុមារភាព
ធម្មតាទេ គាត់នឹងប្រើរបៀបដែលគាត់ធ្លាប់ជួប ជាមួយគ្រួសាររបស់គាត់មកប្រើនៅពេលគាត់បង្កើតគ្រួសារថ្មីជាមួយអ្នក។ ដូច្នេះបើអ្នកមិនពេញចិត្តចំពោះចំណុចណាមួយអ្នកគួរតែប្រាប់គាត់ និងកំណត់ព្រំដែនសម្រាប់គាត់តាមអ្វីដែលអ្នកគិតថាអាចទទួលយកបាន។
៦. ដឹងអ្វីដែលគាត់រំពឹងចង់បានពីអ្នក
អ្នកមិនអាចមើលចិត្តគាត់ធ្លុះគ្រប់រឿងនោះទេ ដូច្នេះគួរសួរគាត់ផ្ទាល់ពីការរំពឹងសំខាន់ៗដែលគាត់ចង់បានពីអ្នកក្រោយរៀបការហើយ។ អ្នកនឹងមានឧកាសសម្រាប់ត្រៀមខ្លួនជាមុន។
៧. ដឹងពីរបៀបក្នុងការស្រឡាញ់របស់គាត់
តើគាត់ត្រូវការភាពស្និទ្ធស្នាលខ្លាំង ឫក៏ពេលវេលាសំខាន់ទេ សម្រាប់គាត់ក្នុងរឿងស្នេហា? តើអ្នកទាំងពីរត្រូវការអ្វីខ្លះពីគ្នា ដើម្បីទទួលបានអារម្មណ៍ស្រឡាញ់? ចម្លើយរបស់វា សំខាន់ខ្លាំងណាស់សម្រាប់ជីវិតក្រោយរៀបការរួច។
៨. តើគាត់ធ្លាប់ប្រើអំពើហិង្សា ឬធ្លាប់ជាជនរងគ្រោះពីមុនមកទេ
បើមិនដែលសួរ អ្នកគួរតែប្រញាប់សួរភ្លាមទៅ។ ដឹងពីរឿងអតីតកាលរបស់គាត់ ជួយអ្នកឲ្យស្វែងយល់ពីគាត់កាន់តែច្បាស់ នៅពេលដែលមានបញ្ហានេះកើតឡើងនៅថ្ងៃអនាគត។
៩. ដឹងអំពីទស្សនៈក្នុងរឿងនយោបាយរបស់គាត់
នយោបាយគឺជារឿងដ៏រសើប នៅក្នុងពិភពលោកពេលបច្ចុប្បន្ន។ ចង់ឬមិនចង់អ្នកត្រូវដឹងថាគាត់ កំពុងឈរក្នុងក្រុមណាមួយក្នុងរឿងនេះ។ ប្រសិនបើអ្នកទាំងពីស្ថិតនៅបក្សពីរដែលប្រឆាំងទស្សនៈគ្នាដាច់ខាត ការខ្វែងគំនិតគ្នាប្រាកដជាកើតឡើងនៅពេលណាមួយជាក់ជាមិនខាន។
១០. ដឹងពីអ្វីដែលគាត់ផ្ដល់តម្លៃខ្ពស់
តើគាត់តែងតែខ្វល់ពីរឿងអ្វីខ្លះ? ភាពស្មោះត្រង់ ការរស់នៅស្អាត ពេលវេលាផ្ទាល់ខ្លួន ការថែរក្សាសុខភាព តើវាសំខាន់សម្រាប់គាត់ខ្លាំងប៉ុណ្ណា? អ្វីដែលគាត់យល់ថាសំខាន់ និងអ្វីដែលគាត់មិនសូវយកចិត្តទុកដាក់ អ្នកត្រូវតែដឹង ដើម្បីប្រាកដថាការផ្តល់តម្លៃរបស់អ្នកទាំងពីរមិនមានភាពប្រទាញប្រទង់គ្នាខ្លាំងទេ។
១១. ដឹងពីរបៀបក្នុងការប្រារព្ធកម្មវិធី សម្រាប់ថ្ងៃពិសេសៗរបស់គាត់
ម្នាក់ចូលចិត្តពញ្ញាក់អារម្មណ៍ក្នុងថ្ងៃខួបកំណើត រៀបចំពិធីជប់លៀងធំដុំ ហើយម្នាក់ទៀតគ្រាន់តែចង់ញ៉ាំអាហារពេលល្ងាចជាមួយមនុស្សស្និទ្ធប៉ុន្មាននាក់។ វាពិតជាធ្វើឲ្យអ្នកទាំងពីរខ្វែងគំនិតគ្នានៅពេលក្រោយរៀបការមិនខាន។
១២. ភាពស្និទ្ធស្នាលរបស់គាត់ជាមួយគ្រួសារ
ប្រសិនបើអនាគតប្តីរបស់អ្នកឧស្សាហ៍ទៅលេងផ្ទះម៉ាក់ប៉ារបស់គាត់ជាងគ្រួសារអ្នក អ្នកត្រូវដឹងថាហេតុអ្វីទើបបែបនេះ។ ដឹងពីកម្រិតនៃភាពស្និទ្ធស្នាលរបស់គាត់អាចឲ្យអ្នកត្រៀមខ្លួនទទួលយក និងបង្ការជម្លោះទៅថ្ងៃមុខ។
១៣. ដឹងពីមូលហេតុដែលគាត់ចង់រៀបការជាមួយអ្នក
ឆ្ងល់ទេ ហេតុអ្វីគាត់សម្រេចចិត្តជ្រើសរើសអ្នកជាគូអនាគតរបស់គាត់។ ប្រសិនបើចម្លើយរបស់គាត់ ស្ដាប់ទៅមិនដូចអ្វីដែលអ្នកគិត ឫមិនសមហេតុផល អ្នកគួរតែផ្អាកគម្រោងមួយរយៈសិន ហើយព្យាយាមសួរគាត់ដើម្បីរកអំណះអំណាងដែលអាចទទួលយកបាន។
ចំណុចដែលចាំបាច់ទាំង១៣ខាងលើ អ្នកត្រូវតែសួរអនាគតប្តីរបស់អ្នកកុំខាន ព្រោះថាវាគឺជាមូលដ្ឋានគ្រឹះដែលអាចឲ្យការចាប់ផ្តើមនៃជីវិតអាពាហ៍ពិពាហ៍របស់អ្នកឈានទៅរកភាពជោគជ័យមួយចំណែកធំ ៕
No comments:
Post a Comment